Një objekt i çuditshëm, që ngjan me një meduzë gjigante, është filmuar në qiellin e Alaskës, duke ngritur pikëpyetje për atë që mund të ketë qenë. Pamjet janë regjistruar në drejtim të një baze të rëndësishme ushtarake amerikane, ku janë të dislokuar edhe avionët luftarakë F-22 Raptor.
Ngjarja ka ndodhur më 15 qershor, rreth orës 22:13, në Anchorage, ndërsa video është bërë virale në rrjet ditët e fundit. Sara Jane Osborn po fotografonte një ylber së bashku me bashkëshortin e saj, kur vuri re një objekt të errët që u shfaq mbi pemët në distancë. Ajo nxitoi ta filmonte, ndërsa objekti qëndronte pezull në ajër.
Ajo që e bënte pamjen veçanërisht të pazakontë ishin disa zgjatime që vareshin nga pjesa e poshtme e objektit dhe lëviznin në mënyrë të pavarur, duke krijuar pamjen e tentakulave të një meduze. Objekti dukej se rrotullohej dhe lëvizte lehtë nga njëra anë në tjetrën, përpara se të zhdukej papritur pas rreth tre minutash.
Sipas Osborn, objekti ndodhej në drejtim të bazës ushtarake Joint Base Elmendorf-Richardson (JBER), një instalim strategjik që mbështet operacionet e mbrojtjes ajrore, vëzhgimit dhe transportit ushtarak. Megjithatë, nuk ka konfirmim se objekti ka fluturuar mbi bazë apo se ka pasur ndonjë lidhje me aktivitetin e saj.
Gruaja tregoi se pas filmimit ajo dhe bashkëshorti kërkuan përreth për të gjetur ndonjë shpjegim, por nuk panë as ndonjë balonë, as person që mund ta kishte lëshuar atë. Ajo u shpreh gjithashtu se madhësia e objektit i kishte habitur, pasi një avion i vogël që kishin parë gjatë qëndrimit në zonë dukej shumë i vogël në krahasim me të.
Deri më tani nuk ka një shpjegim të konfirmuar për objektin e filmuar në Alaska. Nuk dihet nëse bëhej fjalë për ndonjë mjet fluturues të zakonshëm, një balonë apo diçka tjetër që ende nuk është identifikuar.
