Një qytetar ka denoncuar pranë redaksisë një situatë shqetësuese në rrugën “Muhedin Llagami”, ku, sipas tij, prej disa javësh hapësira publike e trotuarit është kthyer në një parkim të improvizuar, duke krijuar vështirësi të mëdha për lëvizjen e këmbësorëve dhe duke rrezikuar sigurinë e tyre.
Përmes një mesazhi drejtuar redaksisë, qytetari shprehet se situata është përkeqësuar, pasi automjetet nuk qëndrojnë vetëm të parkuara në këtë segment, por edhe qarkullojnë në hapësirat ku duhet të lëvizin këmbësorët.
Ai sjell në vëmendje edhe një rast konkret, duke treguar se një nënë ka qenë shumë pranë përplasjes nga një automjet.
Qytetari ngre shqetësimin për mungesën e kontrollit dhe ndërhyrjes nga institucionet përgjegjëse, ndërsa kërkon marrjen e masave për të mos lejuar që rruga të vijojë të përdoret si parkim dhe që këmbësorët të detyrohen të lëvizin në kushte të pasigurta.
Banorët dhe kalimtarët kanë nevojë për hapësira të lira dhe të sigurta për të ecur, pa u përballur çdo ditë me rrezikun e përplasjes nga automjetet.
Apeli i qytetarit është për institucionet përgjegjëse dhe Policinë Bashkiake që të ndërhyjnë sa më parë, të verifikojnë situatën në terren dhe të marrin masa për lirimin e hapësirës publike, përpara se të ndodhë një aksident me pasoja të rënda.
