Një aksident i rëndë rrugor është regjistruar këtë të enjte në Pogradec, duke përfunduar tragjikisht me humbjen e jetës së një të riu vetëm 26 vjeç.
Ngjarja mësohet se ka ndodhur në aksin rrugor Pogradec–Qafë Plloçë, në afërsi të fshatit Starovë. Përplasja ka rezultuar fatale për të riun, i cili ka ndërruar jetë në vendngjarje, pa mundur t’u mbijetojë plagëve të marra.
Pas aksidentit, në vendin e ngjarjes kanë mbërritur shërbimet e policisë, të cilat po punojnë për të dokumentuar rrethanat e ngjarjes dhe për të përcaktuar shkaqet që çuan në këtë aksident tragjik.
Deri më tani, nuk ka informacion të mëtejshëm mbi mënyrën se si ka ndodhur aksidenti. Ndërkohë, pritet që hetimet të hedhin dritë mbi dinamikën e plotë të ngjarjes që i mori jetën 26-vjeçarit.
