Edhe ministrja Delina Ibrahimaj, në linjë me kolegët e saj të qeverisë, ka reaguar ndaj protestës së studentëve duke vënë theksin te ruajtja e qetësisë dhe e pasurisë së përbashkët. Në postimin e saj në rrjetet sociale, ajo e pranon se protestat janë një e drejtë legjitime, por tërheq vëmendjen se tensionet dhe dëmtimi i pronës kanë kosto serioze për imazhin e vendit dhe ekonominë.
“Mos të dëmtojmë sot atë të ardhme më të mirë që kërkojmë për nesër,” shkruan ajo, duke bërë thirrje që zëri i të rinjve të dëgjohet përmes dialogut dhe jo përmes përplasjeve që tronditin besimin e investitorëve dhe prekin hapësirat e përbashkëta.
Në fund të fundit, thirrja e ministres prek një realitet që shpesh harrohet në vrullin e çdo proteste: tensionet e rrugës lënë pasoja te imazhi i një vendi që përpiqet të tërheqë vëmendjen e huaj. Megjithatë, mbetet gjithmonë sfida e madhe e çdo qeverie , si të balancosh shqetësimin për fasadën dhe ekonominë, me nevojën urgjente për t'u dhënë zgjidhje konkrete problemeve reale që nxjerrin të rinjtë në rrugë që në fillim.
