Simon Andriesz, ish-bankieri britanik dhe whistleblower-i që kishte nxjerrë në dritë të dhëna mbi marrëdhëniet mes Sekretarit të Tregtisë së SHBA-së, Howard Lutnick, dhe Jeffrey Epstein, është gjetur i vdekur në moshën 57-vjeçare.
Vdekja e Andriesz u konfirmua nga Andy Agathangelou, themeluesi i organizatës Transparency Task Force, i cili e përshkroi atë si një anëtar të çmuar të komunitetit. Sipas raportimit të The Banker, Andriesz kishte vdekur nga vetëvrasja, ndërsa shkaku nuk është bërë zyrtarisht publik nga personat që konfirmuan vdekjen. Nuk ka gjithashtu prova publike që e lidhin vdekjen e tij me aktivitetin si whistleblower.
Andriesz kishte punuar për vite në sektorin financiar dhe kishte qenë managing director në BGC Group, ku Lutnick ishte drejtues. Në vitin 2026, ai tërhoqi vëmendjen pasi analizoi dokumentet e publikuara në kuadër të dosjeve të Epstein dhe zbuloi emaile që, sipas tij, tregonin se marrëdhëniet mes Lutnick dhe Epstein kishin vijuar edhe pas vitit 2005.
Lutnick kishte deklaruar më herët se kishte ndërprerë kontaktet me Epstein pas vitit 2005. Megjithatë, dokumentet e bëra publike përfshinin komunikime mes tyre për çështje biznesi, ndërsa më vonë Lutnick pranoi para Kongresit se kishte vizituar ishullin privat të Epstein në vitin 2012, së bashku me bashkëshorten dhe vajzat e tij. Ai ka mohuar çdo shkelje apo veprim kriminal në lidhje me Epstein.
Andriesz kishte deklaruar gjithashtu se në vitet 2020 dhe 2021 i kishte përcjellë FBI-së informacione lidhur me marrëdhënien mes Lutnick dhe Epstein.
Në korrik, historia e tij u trajtua edhe në një dokumentar të BBC-së mbi dosjet e Epstein, Lutnick dhe lidhjet e tyre me figura të tjera të njohura. Andriesz kishte pretenduar gjithashtu se kompania e shërbimeve financiare Cantor Fitzgerald kishte diskutuar një marrëveshje prej rreth 1 milion paundësh që përfshinte ish-princin Andrew dhe prezantime me persona të pasur e institucione shtetërore. Cantor Fitzgerald ka mohuar më herët se kishte pasur marrëdhënie biznesi me ish-princin.
Në postimin e tij të fundit në X, më 9 gusht, Andriesz foli për pasojat personale që, sipas tij, kishte sjellë denoncimi publik dhe pretendoi se ai dhe familja e tij kishin vuajtur si pasojë. Ai la të kuptohej gjithashtu se kishte ende prova të tjera që synonte t'i publikonte.
Vdekja e tij ka rikthyer vëmendjen te denoncimet që kishte bërë dhe te hetimet mbi marrëdhëniet e Epstein me persona të fuqishëm në botën e biznesit dhe politikës. Megjithatë, deri tani nuk ka të dhëna publike që të tregojnë se vdekja e Andriesz ka lidhje me këto denoncime.
