Një aksident i rëndë trafiku i ka marrë jetën 21-vjeçares Anita Hoxhaj në Vlashnje të Prizrenit.
Vdekja e të resë është bërë e ditur nga familjarët e saj, të cilët kanë shprehur dhimbjen për humbjen e parakohshme.
“Lusim Zotin që shpirtin e saj ta mëshirojë dhe ta bëjë prej luleve të Xhenetit”, ka shkruar një familjar në reagimin e tij.
Aksidenti ka ndodhur rreth orës 20:25, në rrugën që çon drejt fshatit Kobaj. Sipas Policisë së Kosovës, 21-vjeçarja është goditur nga një automjet dhe është dërguar për trajtim në Spitalin e Përgjithshëm të Prizrenit.
Pavarësisht përpjekjeve të mjekëve, rreth orës 21:00 policia është njoftuar nga spitali se e reja nuk ka arritur t’u mbijetojë plagëve të marra.
Në vendin e ngjarjes kanë dalë njësitet policore, ndërsa personi i dyshuar për aksidentin është arrestuar.
Me autorizim të prokurorit kujdestar, kanë nisur hetimet për zbardhjen e plotë të rrethanave që çuan në aksidentin tragjik.
