Hetimet për vrasjen e shqiptarit Ferdinant Hoti, 35 vjeç, janë zgjeruar në provincën e Venecias. Hoti, me banim në Mirano, u gjet i vrarë në pjesën e pasme të një automjeti Fiat Bravo, i cili ishte hedhur në ujërat e lumit Tergola, në San Giorgio delle Pertiche, në provincën e Padovës.
Trupi i viktimës ishte i mbështjellë me një qese të zezë dhe duart i kishte të lidhura. Sipas të dhënave të para mjeko-ligjore, Hoti dyshohet se është vrarë me një plumb të qëlluar nga afër, përpara se makina të përfundonte në lumë. Autopsia pritet të ndihmojë në përcaktimin e saktë të shkaqeve dhe rrethanave të vdekjes.
Hetuesit po përqendrohen veçanërisht te lëvizjet dhe kontaktet e fundit të 35-vjeçarit. Një nga pistat që po shqyrtohet është ajo e një larjeje hesapesh të lidhur me trafikun e drogës.
Në fokus është edhe një ngjarje e ndodhur në Mirano më 1 korrik, kur një 20-vjeçar shqiptar u plagos me armë zjarri në zonën e Zianigos. Për këtë sulm u arrestuan dy bashkëkombës të tij. Hetuesit po verifikojnë nëse mes këtij episodi dhe vrasjes së Hotit mund të ketë ndonjë lidhje.
Një element tjetër i rëndësishëm janë kamerat e sigurisë. Karabinierët po rindërtojnë itinerarin e Fiat Bravo-s përmes kamerave dhe pikave të kontrollit rrugor, duke kërkuar të zbulojnë nëse automjeti është shoqëruar nga një makinë tjetër, e cila mund të jetë përdorur nga autorët për t’u larguar nga vendi i ngjarjes.
Hetuesit po shqyrtojnë gjithashtu marrëdhëniet mes pronarit të Fiat Bravo-s, një shtetas italian me banim në zonën e Venecias, dhe personit që kishte në përdorim automjetin në momentin kur ai u fundos në lumë.
Qëllimi i hetimit është të përcaktohet motivi i vrasjes dhe identiteti i autorit ose autorëve, si dhe të sqarohet roli i personave që mund të kenë ndihmuar në fshehjen e trupit dhe automjetit.
