Një festë ditëlindjeje duket se ka nisur me shumë entuziazëm në zonën e Stacionit të Trenit në Tiranë, por zhurma dhe atmosfera e festës duket se kanë dalë përtej mureve të apartamentit, duke tërhequr vëmendjen edhe të banorëve të tjerë të pallatit.
Pikërisht për këtë arsye, një denoncim ka mbërritur në redaksinë e JOQ Albania, i shoqëruar me pamje të filmuara gjatë natës, ku shihet apartamenti i ndriçuar dhe atmosfera e festës.
Sipas denoncuesit, sapo ora shënoi 00:00, nga banesa nisën urimet për një vajzë të quajtur Paula. Në fillim, banorët menduan se bëhej fjalë për një fejesë, por më pas kuptuan se ishte një festë ditëlindjeje.
“U çmendën banorët e pallatit, zgjuan gjithë lagjen, ora 12 e natës”, shkruan qytetari.
Në fund të fundit, ditëlindja është për t’u festuar dhe një “Gëzuar!” në mesnatë është krejt normale. Por kur urimet, muzika dhe festa dëgjohen në gjithë pallatin, situata mund të mos jetë edhe aq festive për ata që duan të flenë.
Kështu që, urime ditëlindjen, Paula! Por herën tjetër, ndoshta festa mund të mbetet festë vetëm për të ftuarit dhe jo për gjithë lagjen.
