Një person është filmuar në orët e para të mëngjesit duke lëvizur në korridorin e një pallati dhe duke u ndalur te dera e një banese në zonën e Pazarit të Ri në Tiranë, në një rast që denoncuesi e konsideron shqetësues.
Pamjet e dërguara në redaksinë e JOQ Albania, të regjistruara nga kamera e sigurisë, tregojnë një të ri që afrohet te dera e një banese, troket dhe prek pjesën e dorezës, përpara se të qëndrojë për disa çaste aty. Më pas, ai largohet nëpër korridor.
Sipas denoncuesit, nuk bëhet fjalë për një rast të izoluar. Ai pretendon se i njëjti person është shfaqur edhe më parë pranë banesës së një të njohuri të tij, duke trokitur ose kontrolluar dyert.
“Kini kujdes nga ky, se del në mes të natës dhe provon dyert e shtëpive”, shkruan qytetari, duke bërë thirrje që banorët të jenë të vëmendshëm.
Nga pamjet e kamerës nuk mund të konfirmohet qëllimi i personit apo nëse ai ka tentuar të hyjë në banesë. Megjithatë, prania e tij në korridor në orët e vona të natës dhe sjellja pranë derës ka shqetësuar denoncuesin.
Nëse ky person është shfaqur edhe në banesa të tjera të zonës, banorët mund të verifikojnë kamerat e sigurisë dhe, në rast të ndonjë tentative për hyrje apo veprimi të dyshimtë, të njoftojnë Policinë.
