Pas rreth tetë vitesh në arrati, janë publikuar pamjet e arrestimit në Rumani të Aurel Hoxhallarit, i njohur edhe si Altin Hoxhallari, një prej personave më të kërkuar nga drejtësia shqiptare.
49-vjeçari ishte shpallur në kërkim që prej vitit 2018 dhe ishte dënuar në mungesë me burgim të përjetshëm nga GJKKO, si organizator dhe porositës i vrasjes së Devi Kasmit.
Hoxhallari u lokalizua nga autoritetet rumune në kuadër të bashkëpunimit me Policinë e Shtetit shqiptar dhe tashmë pritet të ekstradohet drejt Shqipërisë, ku do të vuajë dënimin.
Devi Kasmi u ekzekutua më 29 janar 2018 në rrugën “Kongresi i Manastirit” në Tiranë, pranë banesës së tij. Sipas hetimeve, atentati ishte planifikuar prej muajsh, ndërsa si ekzekutor u identifikua ish-komandoja grek Efthimios Eftimiu, i dënuar gjithashtu me burgim të përjetshëm.
Ky hap i autoriteteve rikthen në vëmendje një nga dosjet më të bujshme të krimit të organizuar në Shqipëri, ndërsa pritet që procedurat për ekstradimin e Hoxhallarit të përfundojnë në vijim.
