Pas gati katër vitesh arrati në zonat malore të lindjes së Shqipërisë, 42-vjeçari shqiptar i dënuar në Itali për një sërë vjedhjesh është ekstraduar drejt vendit fqinj. Ai duhet të vuajë 5 vjet, 9 muaj e 5 ditë burg, si dhe të paguajë një gjobë prej 1,640 eurosh. Pas mbërritjes në aeroportin e Romës, ai iu dorëzua autoriteteve italiane dhe u transferua në burgun e Viterbos.
Kërkimet për të kishin nisur në vitin 2022, pasi një vendim për bashkimin e dënimeve nuk mundi të ekzekutohej, pasi 42-vjeçari nuk gjendej. Hetuesit italianë dhe shqiptarë ndoqën gjurmët e tij deri në Shqipëri, ndërsa më 11 mars ai u identifikua dhe u ndalua në portin e Durrësit. Gjatë kontrolleve, autoritetet zbuluan se ai kishte përdorur të paktën shtatë identitete të ndryshme, mes tyre Armando Valchizan, Armando Dervishi, Armando Gheorghe, Altin Dervishi dhe Martin Dervishi.
42-vjeçari ishte dënuar për gjashtë vjedhje të kryera gjatë viteve 2013–2016 në Lignano Sabbiadoro dhe Caorle, ndërsa një tjetër vjedhje ishte kryer në një banesë në Romë. Objektivat kryesorë ishin shtëpi pushimi dhe dhoma hotelesh të frekuentuara nga turistë. Në vitin 2016, karabinierët i kishin gjetur një kartë identiteti rumune të falsifikuar, ndërsa përdorimi sistematik i identiteteve të ndryshme e kishte bërë veçanërisht të vështirë lokalizimin dhe identifikimin e tij.
