Banorët e Lagjes së Spitalit kanë denoncuar përmes JOQ Kosova qarkullimin e disa kamionëve të punimeve në rrugën “Holger Pedersen”, të cilët, sipas tyre, çdo ditë rreth orës 04:00 të mëngjesit shkaktojnë zhurmë të madhe dhe qarkullojnë me shpejtësi.
Qytetarët thonë se zhurma po ua pengon gjumin dhe pushimin, veçanërisht fëmijëve, ndërsa gjatë ditës shumica e banorëve kanë obligime të ndryshme.
Ata shprehen se e kuptojnë nevojën për zhvillimin e punimeve për shkak të temperaturave të larta gjatë ditës, por kërkojnë që të respektohet qetësia e banorëve gjatë natës dhe në orët e hershme të mëngjesit.
Sipas denoncimit të dërguar në JOQ Kosova, për këtë çështje është njoftuar edhe Policia e Trafikut, mirëpo deri më tani, qytetarët thonë se nuk kanë marrë ndonjë zgjidhje konkrete.
Banorët kërkojnë nga institucionet përgjegjëse që të ndërmarrin masa lidhur me shpejtësinë, zhurmën dhe qarkullimin e kamionëve në orët e hershme të mëngjesit.
Ata theksojnë se bëhet fjalë për një shqetësim të përbashkët të banorëve të Lagjes së Spitalit, dhe apelojnë te institucionet që ta trajtojnë këtë problem.
