Një mesazh i veçantë ka mbërritur në redaksinë e JOQ Albania nga një familje shqiptare, e cila shpreson të gjejë një person që e ndihmoi gjatë udhëtimit drejt Gjermanisë.
Sipas qytetares, mbrëmjen e kaluar ajo, bashkëshorti dhe familja e tyre u takuan me një burrë nga fshati Pirq i Mitrovicës, i cili jeton në Gjermani. Takimi ndodhi teksa prisnin në kufirin mes Malit të Zi dhe Kroacisë.
Familja tregon se burri i orientoi për rrugën që duhej të ndiqnin drejt Gjermanisë dhe gjatë bisedës kaluan momente shumë të këndshme. Megjithatë, në nxitim e sipër, u ndanë pa shkëmbyer numrat e telefonit.
"Na ndihmoi shumë. Bashkëshortit tim i ka mbetur peng që nuk ia mori numrin. Gjatë bisedës na tha se i ndjek çdo ditë lajmet e JOQ Albania, ndaj shpresojmë që përmes jush të arrijmë ta gjejmë", shkruan qytetarja në mesazhin e dërguar në redaksi.
Sipas saj, burri udhëtonte me një Audi Q7 dhe ishte i shoqëruar nga djali i tij 19-vjeçar.
Nëse personi në fjalë e njeh veten ose dikush e njeh familjen e tij, mund të kontaktojë redaksinë e JOQ Albania, në mënyrë që t'i lidhim sërish me familjen që dëshiron ta falënderojë për ndihmën dhe mirësinë e treguar gjatë udhëtimit.
