Të shtëna me armë zjarri janë raportuar në fshatin Gjorm të Kurbinit, ku një 22-vjeçar ka mbetur i plagosur.
I riu është identifikuar si Veron Pasha. Sipas informacioneve të reja, ai është qëlluar me armë zjarri dhe ka marrë një plumb në pjesën e kofshës.
Pas ngjarjes, 22-vjeçari është transportuar me urgjencë drejt Spitalit të Traumës në Tiranë, ku po merr ndihmën e specializuar mjekësore. Burime paraprake bëjnë me dije se gjendja e tij shëndetësore paraqitet e stabilizuar dhe ai ndodhet nën monitorimin e mjekëve.
Ndërkohë, forca të shumta policie kanë mbërritur në vendngjarje dhe kanë nisur hetimet për zbardhjen e plotë të rrethanave të plagosjes, si edhe për identifikimin dhe kapjen e autorit ose autorëve të dyshuar.
Deri në këto momente nuk janë bërë të ditura motivet e ngjarjes dhe mbetet e paqartë dinamika e konfliktit që çoi në përdorimin e armës së zjarrit. Hetimet vijojnë.
