Katër persona kanë mbetur të lënduar si pasojë e një aksidenti trafiku që ka ndodhur të enjten në fshatin Banjë të Istogut.
Sipas Policisë së Kosovës, aksidenti është raportuar rreth orës 13:10 dhe në të janë përfshirë dy vetura.
Zëdhënësi i Policisë për Rajonin e Pejës, Driton Rugova, ka bërë të ditur se të gjithë të lënduarit kanë pësuar lëndime trupore dhe janë transportuar në Spitalin e Përgjithshëm në Pejë për trajtim mjekësor.
Ndërkohë, njësitet policore kanë dalë në vendin e ngjarjes dhe kanë nisur hetimet për të sqaruar rrethanat dhe shkaqet që çuan deri te aksidenti.
