Nuk ka arritur t'u mbijetojë plagëve të rënda 19-vjeçari Klement Balla, i cili u aksidentua pasditen e sotme në aksin kombëtar Elbasan–Librazhd.
Edhe pse u transportua me urgjencë drejt spitalit pas përplasjes së fortë në fshatin Mengël, ku makina e tij doli nga rruga dhe u shkatërrua plotësisht, mjekët nuk kanë mundur dot ta mbajnë në jetë të riun nga fshati Griqan.
Me ndarjen nga jeta të 19-vjeçarit, ngjarja ka kaluar menjëherë nën drejtimin e Prokurorisë. Grupi hetimor po kryen veprimet e fundit në vendngjarje për të rindërtuar dinamikën e plotë. Paraprakisht mendohet se shpejtësia e madhe ka bërë që i riu të humbte kontrollin e mjetit, duke u përplasur fatalisht me barrierat anësore.
