Lushnje: Dyshime mbi tenderin 6.1 milionë euro të dhënë nga vartësit e Enea Karakaçit

Një procedurë tenderimi e zhvilluar së fundmi nga Shoqëria Rajonale Ujësjellës Kanalizime Lushnje SH.A, nën varësinë e Ministrisë së Infrastrukturës dhe Energjisë të drejtuar nga Enea Karakaçi, po ngre pikëpyetje të mëdha mbi transparencën e përzgjedhjes së fituesve në prokurimet publike.

Objekti i këtij tenderi me numër reference REF-86285-05-20-2026, është i një rëndësie jetike: "Rrjeti i Ujësjellësit të fshatrave Zhamë, Gramsh, Konjat, Dushk, Thanasaj Njesia administrative Dushk, Bashkia Lushnje". Mirëpo, ajo që duhej të ishte një garë e pastër mes operatorëve ekonomikë, ka përfunduar me një rezultat që ngre hije të forta dyshimi për një "fitues të paracaktuar".

Nga hulumtimi i dokumentacionit zyrtar të procedurës, rezulton se në këtë tender kanë dorëzuar ofertat e tyre plot 9 pjesëmarrës. Në një garë normale tregtare, qëllimi i autoritetit kontraktues është të përzgjedhë ofertën më ekonomike dhe më të favorshme për buxhetin e shtetit.

Por në këtë rast ka ndodhur e kundërta: Fitues ka dalë bashkimi i operatorëve "ARKONSTUDIO" në pronësi të Erjon Këri dhe Krenar Dila dhe "ED KONSTRUKSION" në pronësi të Alfred, Ramadan, Jorgjie dhe Eduart Ibrahimi. Ky bashkim firmash është shpallur fitues ndonëse ka pasur një ndër ofertat më të larta në tavolinë.

Shifrat: Fituesit marrin gati 94% të fondit limit

Për të kuptuar se sa pranë tavanit maksimal ka qenë kjo ofertë, mjafton të shohim matematikën e thjeshtë të këtij prokurimi:

• Fondi Limit: 479,443,062.50 Lekë të reja (pa TVSH) / rreth 6.1 milionë euro (me TVSH).
• Vlera Fituese: 449,101,061.19 Lekë të reja (pa TVSH) / rreth 5.7 milionë euro (me TVSH).

Llogaritja: Vlera fituese e shpallur për bashkimin e kompanive "ARKONSTUDIO" dhe "ED KONSTRUKSION" përbën plot 93.67% të fondit limit.

Një diferencë kaq e ngushtë med fondin limit ku janë "kursyer" vetëm rreth 6.3% e vlerës totale, e kombinuar me skualifikimin apo injorimin e 4 ofertave të tjera më të ulëta, shton akoma më shumë dyshimet e ekspertëve të prokurimeve.

Praktika të tilla shpesh ngrenë dyshime të bazuara për:

1. Kriteret e qepura me porosi: Skualifikimi i operatorëve të tjerë me oferta më të lira nën pretekstin e "mosplotësimit të kritereve teknike".
2. Mungesë gare reale: Përdorimi i pjesëmarrësve të tjerë thjesht si "numra" për të krijuar iluzionin e një gare, ndërkohë që fituesit kanë qenë të projektuar që në fillim.

Mbetet për t'u parë nëse Ministria e Infrastrukturës dhe Energjisë apo organet kompetente të monitorimit të prokurimeve do të ndërmarrin një hetim mbi procedurën e ndjekur nga Ujësjellës Kanalizime Lushnje SH.A, për të sqaruar se pse paratë e taksapaguesve shqiptarë po shpenzohen në limitet maksimale, duke skualifikuar ofertat më ekonomike të operatorëve të tjerë në garë.