Një aksident rrugor është regjistruar pak minuta më parë në Tiranë, ku një i moshuar është përplasur nga një automjet teksa ishte duke lëvizur si këmbësor.
Në redaksinë e JOQ Albania kanë mbërritur pamje nga vendngjarja, ku i moshuari shihet i shtrirë në asfalt, ndërsa qytetarë të pranishëm i afrohen menjëherë për t'i dhënë ndihmën e parë deri në mbërritjen e shërbimeve të emergjencës.
Sipas qytetarit që dërgoi videon, aksidenti ka ndodhur pranë zonës së njohur si "3-shi", në afërsi të mbikalimit të shinave.
Nga pamjet duket se këmbësori ka pësuar gjakderdhje, megjithatë në momentin e filmimit ai shfaqet i vetëdijshëm. Gjendja e tij shëndetësore nuk dihet ende, ndërsa rrethanat e aksidentit mbeten të paqarta.
JOQ Albania shpreson që i moshuari të jetë jashtë rrezikut për jetën dhe u bën thirrje drejtuesve të mjeteve të tregojnë kujdes të shtuar, veçanërisht në zonat me lëvizje të dendur të këmbësorëve.
