Një banor i fshatit Veliqot, në Bashkinë Tepelenë, i është drejtuar redaksisë së JOQ Albania me një denoncim për gjendjen e varrezave të fshatit, ku, sipas tij, bagëtitë futen vazhdimisht brenda territorit të tyre pa u penguar nga askush.
Në videot e mbërritura në redaksi shihen lopë dhe gomarë që lëvizin dhe kullosin mes varreve, duke kaluar pranë lapidarëve dhe hapësirave ku prehen të afërmit e banorëve.
Sipas qytetarit, kjo situatë përsëritet sa herë që ai viziton varrezat.
"Vij që prej Tiranës në fshatin e mamit, në Veliqot. Sa herë vij, i gjej bagëtitë të futura brenda varrezave. Roja i varrezave vetëm bën sehir", shkruan ai.
Banori shprehet se është e papranueshme që një vend i shenjtë dhe i respektit për të ndjerët të lihet në këtë gjendje, ndërsa kërkon ndërhyrjen e Bashkisë Tepelenë dhe institucioneve përgjegjëse për të marrë masa.
Sipas tij, mjafton një rrethim funksional dhe një mbikëqyrje më e mirë për të shmangur hyrjen e kafshëve në varreza dhe për të ruajtur dinjitetin e këtij ambienti.
JOQ Albania fton Bashkinë Tepelenë dhe përgjegjësit e administrimit të varrezave të reagojnë mbi këtë problem, i cili sipas banorëve vazhdon prej kohësh dhe mbetet ende pa zgjidhje.
