Policia e Tiranës ka nisur procedim penal në gjendje të lirë ndaj 9 personave, të cilët, sipas autoriteteve, kanë vijuar qëndrimin në bulevardin “Dëshmorët e Kombit” edhe pas përfundimit të protestës së mbajtur mbrëmjen e së shtunës.
Sipas njoftimit zyrtar, personat e proceduar kanë tejkaluar orarin e deklaruar për zhvillimin e tubimit dhe kanë zënë hapësira publike përpara godinës së Kryeministrisë, ku kanë vendosur karrige metalike dhe sende të tjera. Policia pretendon se veprimet e tyre kanë penguar lëvizjen e automjeteve dhe kanë cenuar qetësinë publike.
Autoritetet bëjnë me dije se, megjithëse janë bërë disa thirrje për lirimin e zonës dhe respektimin e dispozitave ligjore, personat në fjalë kanë refuzuar të largohen, duke vazhduar qëndrimin në bulevard.
Ndaj tyre po kryhen veprimet procedurale për veprat penale “Pengimi i qarkullimit të mjeteve të transportit”, “Prishja e qetësisë publike” dhe “Organizimi dhe pjesëmarrja në grumbullime të paligjshme”.
Policia njofton gjithashtu se hetimet vijojnë për identifikimin e personave të tjerë që mund të kenë kryer shkelje gjatë zhvillimit të tubimit. Materialet i janë referuar Prokurorisë së Tiranës për veprime të mëtejshme.
