Një shqiptar i diasporës ka dërguar në redaksinë e JOQ Albania një video me një mesazh të fortë simbolik, që rikthen në kujtesë një nga plagët më të mëdha të historisë së vendit: eksodin masiv të shqiptarëve në vitet ’90.
Dikur, me gomone në det të hapur, mijëra shqiptarë lanë pas familjet, shtëpitë dhe gjithçka kishin, të detyruar të kërkonin një jetë më të mirë larg atdheut. Ishte një largim i dhimbshëm, një ikje e imponuar nga varfëria, mungesa e shpresës dhe një politikë që për dekada i detyroi qytetarët të kthenin sytë nga emigrimi.
Sot, pas shumë vitesh larg, një prej tyre ka zgjedhur të bëjë rrugëtimin e kundërt. Me të njëjtën gomone që dikur e largoi nga Shqipëria, ai është nisur drejt vendit të tij për t’u bashkuar me zërat e qytetarëve që protestojnë kundër politikës së vjetër, të cilën e konsiderojnë përgjegjëse për zbrazjen e vendit.
Një udhëtim që nuk është thjesht kthim në tokën e lindjes, por një akt simbolik revolte dhe një mesazh i fortë: shqiptarët që u detyruan të iknin nuk kanë harruar kurrë arsyet që i larguan.
