Një qytetar nga Tirana i është drejtuar redaksisë së JOQ Albania për të denoncuar një konflikt pronësie që, sipas tij, zgjat prej më shumë se 10 vitesh dhe për të cilin pretendon se ende nuk ka marrë një zgjidhje përfundimtare nga institucionet e drejtësisë.
Në videon e dërguar në redaksi, ku shfaqet me zë dhe figurë, qytetari deklaron se ka blerë një objekt dykatësh në zonën e Rrugës së Elbasanit nga familja Toptani dhe se disponon dokumentacionin ligjor që, sipas tij, vërteton pronësinë mbi pasurinë në fjalë.
Ai shprehet se objekti është legalizuar dhe se është pajisur me dokumentet përkatëse të pronësisë, të cilat i paraqet edhe në materialin video të dërguar pranë redaksisë sonë.
Sipas denoncuesit, prej më shumë se një dekade ai është përfshirë në procese gjyqësore që lidhen me lirimin dhe dorëzimin e pronës, pasi e drejta e tij e pronësisë kundërshtohet nga një familje tjetër, të cilën ai e identifikon si familjen Mula nga Tropoja.
Në dëshminë e tij, qytetari ngre pretendime edhe për ndikim të paligjshëm në proceset gjyqësore, duke përmendur me emër Natasha Mulajn. Ai pretendon se ekzistojnë lidhje familjare mes znj. Natasha Mulaj dhe palës kundërshtare në këtë çështje, duke pretenduar se këto rrethana mund të kenë ndikuar në proceset gjyqësore që lidhen me këtë rast. Këto pretendime nuk janë verifikuar në mënyrë të pavarur nga redaksia.
JOQ Albania thekson se këto deklarime janë pretendime të vetë denoncuesit dhe nuk janë verifikuar apo provuar në mënyrë të pavarur nga redaksia jonë.
Qytetari deklaron gjithashtu se, sipas tij, së fundmi ka depozituar një kallëzim në Prokurorinë e Tiranës, ku kërkon verifikimin e pretendimeve të tij lidhur me falsifikim të mundshëm dokumentesh dhe shkelje të tjera të mundshme ligjore që lidhen me këtë çështje.
"Kam mbi 10 vjet që ndjek këtë proces dhe ende nuk kam gjetur zgjidhje. Pres që organet e drejtësisë të bëjnë verifikimet e nevojshme dhe të sqarojnë përfundimisht këtë situatë", shprehet ai në videon e dërguar në redaksi.
JOQ Albania mbetet e hapur për të publikuar çdo reagim, sqarim apo qëndrim nga çdo person tjetër i përmendur në këtë denoncim, në funksion të pasqyrimit të plotë dhe të balancuar të çështjes.
