Një video sa komike aq edhe e pazakontë ka mbërritur në redaksinë e JOQ Albania, duke treguar edhe një herë se kreativiteti shqiptar shpesh nuk njeh kufij.
Pamjet janë filmuar pasditen e sotme në aksin rrugor Sarandë-Vlorë nga disa turistë të huaj që po udhëtonin në zonë. Teksa lëviznin pas një furgoni të bardhë, ata kanë vënë re diçka që u ka tërhequr menjëherë vëmendjen.
Brenda furgonit ishte futur një automjet, i cili dilte pjesërisht nga pjesa e pasme e mjetit transportues. Skena i ka habitur aq shumë turistët, sa reagimet e tyre dëgjohen qartë në video, mes të qeshurave dhe mosbesimit për atë që po shikonin.
Ajo që i ka bërë edhe më shumë përshtypje është fakti se i gjithë transporti po kryhej në një segment rrugor me kthesa të shumta, ndërsa automjeti dukej i siguruar në mënyrë mjaft improvizuese.
Videoja është komentuar me humor dhe habi mes turistëve, të cilët e kanë konsideruar si një nga ato pamje që vështirë se i hasin diku tjetër. Për ta, ishte një moment i paharrueshëm nga udhëtimi në Shqipëri; për ne, një tjetër episod që tregon se kur bëhet fjalë për gjetjen e zgjidhjeve, imagjinata shqiptare shpesh shkon përtej çdo parashikimi.
Po ju, si e komentoni këtë skenë: zgjidhje praktike apo aventurë që nuk duhej provuar?
