Partia Demokratike ka nisur punimet e Kuvendit Kombëtar, ku delegatët do të votojnë për përbërjen e Komisionit të Drejtimit të Punimeve, Sekretariatin Teknik dhe anëtarët e rinj të Këshillit Kombëtar. Mirëpo, përtej procesit zyrtar votimit, fletët e kandidatëve dëshmojnë një realitet tjetër: në vend të qarkullimit të elitave dhe meritokracisë, partia po funksionon si një mbretëri ku postet dhe pushteti trashëgohen brenda familjes.
Edhe pse në fjalimet publike flitet shpesh për hapje ndaj të rinjve dhe fytyrave të reja, listat tregojnë se elita e vjetër politike po kujdeset që vendimmarrja të mbetet sërish te pasardhësit e tyre biologjikë.
Në listën e kandidatëve për postet kyçe të Këshillit Kombëtar, spikatin menjëherë fëmijët e ish-zyrtarëve të lartë dhe figurave historike të kësaj force politike. Ndikimi dhe kapitali politik i prindërve duket se u ka siguruar atyre një rrugë të shkurtër drejt majave të partisë, duke lënë në hije kontributin e qindra militantëve apo të rinjve pa një mbiemër të fuqishëm.
Mes trashëgimtarëve politikë në listat e votimit janë:
Përveç funksionimit mbi parimin e "mbretërisë" dhe dinastive, lista ofron edhe një tjetër kontrast të fortë për të tërhequr vëmendjen e publikut. Krahas fëmijëve të ish-liderëve, në garë për Këshillin Kombëtar janë përfshirë edhe personazhe të njohur të ekranit dhe muzikës.
Mes emrave pikantë që synojnë të angazhohen në strukturat drejtuese janë këngëtari dhe ish-banori i "Big Brother", Armaldo Kllogjeri, si dhe reperi Arkimed Lusha, i njohur gjerësisht me emrin artistik Stresi.
Ndonëse procesi i votimit ka nisur dhe emrat kryesorë tashmë kanë qarkulluar, zyrtarisht strukturat e Partisë Demokratike po i mbajnë ende sekrete detajet e plota të fletëve të votimit. Ende nuk dihet saktësisht se sa anëtarë do të arrijnë të zgjidhen në fund nga kjo listë për të formuar Këshillin e ri Kombëtar. Detaje të tjera pritet të mësohen në vijim, por mesazhi që përcjell kjo fletë votimi mbetet i qartë: pushteti në parti po kalon nga baballarët te fëmijët.
