Trump: Lufta me Iranin do të përfundojë shumë shpejt

Presidenti i SHBA-së, Donald Trump, deklaroi se lufta me Iranin mund të përfundojë shumë shpejt, ndërsa administrata amerikane po shqyrton opsione të reja ushtarake kundër Teheranit. Duke folur në Shtëpinë e Bardhë para anëtarëve të Kongresit, Trump tha se ishte vetëm “një orë larg” nisjes së sulmeve të reja ushtarake, por vendosi t’i pezullonte përkohësisht pas kërkesave nga vendet e Gjirit. Ai paralajmëroi se Irani ka vetëm pak ditë kohë për të arritur një marrëveshje, përndryshe do të përballet me sulme të reja amerikane.

Në një takim të zhvilluar me ekipin e sigurisë kombëtare, ku morën pjesë zyrtarë të lartë si J.D. Vance, Marco Rubio dhe drejtues të Pentagonit e CIA-s, u diskutuan skenarët ushtarakë dhe rrugët diplomatike për konfliktin me Iranin. Sipas mediave amerikane, fakti që ky takim u mbajt menjëherë pas pezullimit të sulmit tregon se mundësia e një operacioni të ri ushtarak mbetet ende e hapur. Vance u shpreh më i rezervuar, duke theksuar se ende ekziston hapësirë për negociata, megjithëse pozicioni i Teheranit mbetet i paqartë.

Nga ana tjetër, ministri i Jashtëm iranian, Abbas Araghchi, paralajmëroi se Irani është i gatshëm të rrëzojë më shumë avionë amerikanë në rast të një përshkallëzimi të ri të luftës. Ai deklaroi se forcat iraniane kanë fituar përvojë të mjaftueshme për të goditur avionë luftarakë modernë si F-35 dhe tha se një konflikt i ri do të sillte “shumë më tepër surpriza”. Araghchi iu referua gjithashtu një raporti të Kongresit amerikan, sipas të cilit dhjetëra avionë dhe dronë janë dëmtuar ose humbur që nga fillimi i operacioneve të përbashkëta SHBA-Izrael kundër Iranit.