Të gjithë e njohim atë ndjesinë: sapo të zë gjumi, komshiu i katit të sipërm fillon të zhvendosë mobiliet, të ecë me taka, ose fëmijët vendosin të organizojnë maratonën e radhës… pikërisht mbi kokën tënde.
Në Shqipëri, zgjidhja zakonisht luhatet mes trokitjes me bisht fshese në tavan dhe ndonjë debati në shkallët e pallatit. Por një i ri nga Kina ka vendosur ta çojë këtë “konflikt klasik” në një nivel krejt tjetër.
I lodhur nga zhurmat e vazhdueshme, ai nuk ka zgjedhur derën e komshiut, por kreativitetin. Ka shpikur një pajisje të thjeshtë, por gjeniale në mënyrën e vet: një shufër elastike me një top plastik në majë, e lidhur me një motor të vogël, që godet tavanin pa pushim.
Zhurmë për zhurmë. Matematikë e pastër.
Pajisja kontrollohet me pult dhe furnizohet me energji përmes USB-së, duke krijuar një goditje ritmike konstante. Për atë poshtë është një “kundërpërgjigje teknologjike”, për atë lart… një test nervash pa afat.
“Nuk besoj se ai di gjë për të drejtat e komshisë,” – shkruan një komentues online. Por kur durimi shteron, duket se ligji i vetëm që funksionon është ai i barazimit të llogarive.
Në një realitet ku izolimi akustik në pallate shpesh është luks dhe jo standard, kjo shpikje po bën xhiron e rrjeteve sociale. Pyetja është e thjeshtë:
A do ta përdornit një “armë” të tillë për komshiun që nuk kupton me fjalë… apo do t’i qëndronit besnik metodës tradicionale me “Oreeee, mjaft!” nga ballkoni?
