Një ngjarje e paprecedentë ka ndodhur në Tiranë, ku debutimi i shumëpritur i projektit EXHALE nga DJ me famë botërore, Amelie Lens, u mbyll në mënyrë të dhunshme.
Edhe pse atmosfera ishte në kulmin e saj dhe mijëra të rinj kishin paguar për të parë njërën prej ikonave botërore të muzikës techno, gjithçka u ndërpre kur forcat e policisë ndërhynë për të ndaluar muzikën.
Arsyeja e kësaj ndërhyrjeje të beftë dyshohet të jetë mungesa e lejeve të nevojshme nga ana e organizatorëve për të vijuar aktivitetin pas mesnatës.
Megjithatë, mungesa e një njoftimi zyrtar dhe të qartë ka lënë vend për shumë dyshime nëse bëhej fjalë për një neglizhencë administrative apo për një zbatim të rreptë e të papritur të rregullave nga autoritetet.
Fansat e shumtë, të cilët kishin krijuar një pritshmëri gjigante për këtë event, mbetën të shokuar kur panë uniformat blu të mbyllnin spektaklin, duke e kthyer atë që duhej të ishte një natë historike në një skandal organizativ.
Amelie Lens njihet globalisht si një nga figurat më me ndikim në muzikën elektronike, duke udhëhequr festivale si Tomorrowland dhe klube ikonike si DC-10 në Ibiza. Përmes platformës së saj EXHALE dhe labelave "Lenske" e "EXHALE Records", ajo ka krijuar një lëvizje që dikton trendet e muzikës underground në mbarë botën.
Ndërprerja e koncertit të saj në Tiranë jo vetëm që ka lënë të zhgënjyer publikun, por ka ngritur pikëpyetje të mëdha mbi mënyrën se si menaxhohen eventet e këtyre përmasave në kryeqytet.
