Prokuroria e Posaçme Kundër Korrupsionit dhe Krimit të Organizuar (SPAK) ka urdhëruar një valë të re kontrollesh në kuadër të hetimeve ndaj ish-zëvendëskryeministres dhe ish-ministres së Infrastrukturës, Belinda Balluku, për dyshime mbi abuzime me tendera publikë në vlerë qindra milionë euro në projektet rrugore dhe infrastrukturore në vend. Sipas raportimeve, gjykata ka miratuar të paktën 15 kontrolle banesash dhe ambientesh të lidhura me dosjen hetimore, përfshirë edhe familjarë dhe persona të afërt me ish-zyrtaren e lartë.
Në kuadër të veprimeve hetimore, burime pranë dosjes bëjnë me dije se është ushtruar kontroll në banesën e Mired Recit, i identifikuar si djali i tezes së Ballukut, si dhe në ambiente të tjera të lidhura me rrethin familjar dhe ekonomik të saj. Gjatë kontrolleve janë sekuestruar celularë, dokumente financiare dhe materiale që dyshohet se lidhen me procedurat e tenderave publikë. Hetimi përfshin edhe lidhje biznesi mes personave të afërt, ku përmenden kompanitë “XL MARKET” shpk dhe “Hippo Tregu Elektrik” shpk, me 49% aksione të lidhura me Recin dhe ortak tjetër Meland Qirko, i cili është i martuar me Pamela Qirko, motrën e Ballukut.
Hetimet e SPAK përqendrohen kryesisht në kontrata publike të mëdha, përfshirë ndërtimin e Tunelit të Llogarasë dhe disa lote të Unazës së Madhe në Tiranë, me vlera që kapin qindra milionë euro. Ndaj Ballukut janë në fuqi masa sigurie si ndalimi i daljes jashtë vendit dhe pezullimi nga detyra, ndërsa hetuesit kanë kërkuar edhe ndihmë ndërkombëtare përmes letërporosive për të gjurmuar lëvizjet financiare dhe pasuritë e mundshme jashtë Shqipërisë. Në këtë fazë, dosja mbetet nën hetim aktiv dhe çdo hap i mëtejshëm do të varet nga provat që do të sigurojë prokuroria.
