Nga Ministria e së Vërtetës.
Deputeti socialist Fatmir Xhafaj mbajti sot një konferencë urgjente për shtyp nga një ballkon që i ngjante në mënyrë të dyshimtë arkitekturës së pallatit që u përfshi nga flakët pranë QSUT-së, për të deklaruar se ai nuk ka absolutisht asnjë lidhje me atë godinë.
“Dua të jem i qartë me popullin shqiptar: unë nuk kam lidhje me atë pallat, nuk kam lidhje me ndërtuesin, madje po filloj të dyshoj se nuk kam asnjë lidhje as me mbiemrin tim,” deklaroi Xhafaj ndërsa rregullonte kollaren, ndërkohë që pas shpine një punëtor po hiqte me nxitim një tabelë ku shkruhej: "Pronë e... e askujt".
Xhafaj shtoi se ai as nuk e dinte që ai pallat ekzistonte deri në momentin që pa lajmet. “U habita shumë kur pashë se ai pallat ishte aty. Unë zakonisht kur kaloj andej mbyll sytë për të praktikuar meditimin transcendental, ndaj nuk kam parë asnjë tullë që është vënë me bekimin tim jo-ekzistent,” vazhdoi ai.
I pyetur nga gazetarët se pse dokumentet e pronësisë dhe lidhjet e biznesit të çojnë direkt te rrethi i tij i ngushtë, Xhafaj tha duke qeshur: “Dokumentet janë thjesht letër. Dhe siç e pamë nga fasada e atij pallati, letra digjet shumë shpejt. Pra, nëse nuk ka dokumente, nuk ka as lidhje. Kjo është logjika e Reformës në Drejtësi që unë vetë e kam udhëhequr.”
Në fund të konferencës, deputeti njoftoi se do të propozojë një ligj të ri ku çdo pallat që merr flakë brenda 10 minutave të shpallet automatikisht "vepër arti abstrakte" dhe të mos ketë nevojë për pronar, sidomos nëse pronari është dikush që emri i fillon me F dhe mbaron me Xhafaj.
Pas fjalimit, ai u largua me një makinë që nuk ishte e tij, drejt një shtëpie që nuk e njihte, për të ngrënë një darkë që ia kishte sjellë një i panjohur që i thërriste "boss".
