Aeroportet evropiane kanë ngritur alarmin se mungesa e karburantit për avionët mund të ndikojë seriozisht në sezonin e pushimeve verore, nëse furnizimet me naftë nuk rifillojnë përmes Ngushticës së Hormuzit brenda tre javëve të ardhshme.
Këshilli Ndërkombëtar i Aeroporteve për Evropën (ACI Europe) i ka dërguar një letër komisionerit të transportit të BE-së, Apostolos Tzitzikostas, duke paralajmëruar se Bashkimi Evropian ndodhet shumë pranë një krize furnizimi.
Ky paralajmërim shton shqetësimet për anulime fluturimesh dhe prishje të planeve të pushimeve, në një kohë kur tensionet mes Shteteve të Bashkuara, Izraelit dhe Iranit vijojnë. Mbyllja e Ngushticës së Hormuzit nga Irani, si kundërpërgjigje ndaj konfliktit, ka prekur një nga rrugët më të rëndësishme të transportit të naftës në botë.
Megjithëse presidenti amerikan Donald Trump ka njoftuar një armëpushim, çmimet e naftës mbeten të larta. Nafta Brent po tregtohet rreth 96 dollarë për fuçi, nga rreth 72 dollarë që ishte para përshkallëzimit të situatës.
Sipas ACI , nëse kalimi përmes Hormuzit nuk rikthehet në mënyrë të qëndrueshme brenda tre javëve, mungesa e karburantit për avionët në Evropë mund të bëhet realitet.
Ndërkohë, çmimet e karburantit për avionë janë rritur ndjeshëm që nga fundi i shkurtit, pas sulmeve ndaj Iranit të urdhëruara nga Donald Trump dhe kryeministri izraelit Benjamin Netanyahu. Sipas statistikave, çmimet globale kanë arritur në rreth 1,650 dollarë për ton, më shumë se dyfishi krahasuar me një vit më parë.
Rajoni më i prekur është Azia, ku çmimet janë rritur me 163%, ndërsa në Evropë rritja ka arritur në 138%, si pasojë e konkurrencës për sigurimin e furnizimeve.
Evropa zakonisht siguron mbi 60% të karburantit të avionëve nga rafineritë e Gjirit, ku më shumë se 40% transportohet përmes Ngushticës së Hormuzit. Situata aktuale ka detyruar vendet evropiane të kërkojnë burime alternative dhe të konkurrojnë me tregjet aziatike, ndërsa furnizimet nga Gjiri kanë nisur të rikthehen gradualisht.
