Një banor i njësisë administrative Lekas në qytetin e Korçës i është drejtuar redaksisë për të ngritur alarmin mbi mungesën e shërbimit shëndetësor në zonë, duke e cilësuar situatën si shqetësuese për komunitetin.
Sipas tij, qendra shëndetësore është lënë në harresë prej kohësh nga institucionet përgjegjëse, duke i lënë banorët pa mbështetje në raste sëmundjesh apo emergjencash.
Banorët shprehen se mjeku i zonës, doktor Ylli, ka dalë në pension dhe prej atëherë qendra nuk është hapur më, çka ka bërë që një shërbim jetik të mungojë plotësisht.
Në këto kushte, ata u bëjnë thirrje institucioneve përkatëse që të ndërhyjnë sa më parë për rikthimin në funksion të qendrës shëndetësore dhe garantimin e shërbimit për komunitetin.
