Bergen në Norvegji kryeson listën e qyteteve ku njerëzit kanë më shumë gjasa të jetojnë deri në 100 vjeç, sipas një raporti të marsit 2026 nga World Depopulation. Qyteti përfiton nga ajri i pastër, ushqimi cilësor dhe një standard shumë i lartë jetese, duke arritur një rezultat jetëgjatësie prej 88.87 pikësh. Jetëgjatësia mesatare në Norvegji është 83.76 vjet, ndërsa në Bergen arrin rreth 84 vjet. Qyteti renditet i 4-ti në botë për cilësinë e jetës dhe i 15-ti për mjedisin, ndërsa më pak se 1 në 16 të rritur janë duhanpirës.
Në vend të dytë renditet Canberra, ku jetëgjatësia kalon 84 vjet falë një popullsie të moshuar shumë aktive dhe normave të ulëta të duhanpirjes (më pak se 8%). Qyteti ka gjithashtu një nga sistemet më të mira të kujdesit shëndetësor dhe infrastrukturës publike në botë, si dhe standarde të larta sigurie ushqimore me 61 pikë. Ndërkohë, Nantes dhe Grenoble dominojnë listën nga Franca, ku jetëgjatësia mesatare është rreth 84 vjet, obeziteti prek vetëm rreth 10% të popullsisë dhe standardet ushqimore arrijnë 69 pikë, ndër më të lartat në Europë.
Pesëshen e parë e mbyll Berna, ku njerëzit jetojnë mbi 84 vjet dhe përfitojnë nga sistemi i fortë shëndetësor dhe siguria ushqimore më e lartë në studim me 77 pikë. Mbi 60% e të moshuarve mbeten fizikisht aktivë dhe obeziteti qëndron në vetëm 12.5%. Studimi, që analizoi 100 qytete në botë duke kombinuar faktorë si jetëgjatësia, obeziteti, duhanpirja dhe cilësia e jetës, thekson se qytetet europiane dhe australiane ofrojnë kushtet më të mira për plakje të shëndetshme, ndërsa qytetet amerikane mbeten prapa për shkak të normave të larta të obezitetit dhe jetëgjatësisë më të ulët.
