Një tragjedi tjetër ka ndodhur në Mesdhe, ku rreth 80 migrantë konsiderohen të zhdukur pas përmbysjes së një varke pranë zonës së kërkim-shpëtimit afër Libisë. Sipas të mbijetuarve, në bord ndodheshin rreth 110 persona, nga të cilët vetëm 32 arritën të shpëtojnë. Deri tani, vetëm dy trupa janë nxjerrë nga deti.
Varka prej druri, me gjatësi rreth 12-15 metra, ishte nisur nga Tripoli dhe u përmbys në det të hapur, duke lënë dhjetëra persona në ujë për një kohë të gjatë para se të mbërrinte ndihma. Të mbijetuarit janë dërguar në Lampedusa, ku kanë rrëfyer momentet dramatike të ngjarjes. “Ishim 110 vetë në bord kur u nisëm”, tha një prej tyre.
Operacioni i shpëtimit u realizua nga Roja Bregdetare italiane, e mbështetur edhe nga anije tregtare në zonë, të cilat hodhën mjete shpëtimi dhe ndihmuan në nxjerrjen e të mbijetuarve. Alarmi për varkën në rrezik u dha fillimisht nga një avion i një organizate joqeveritare, i cili konstatoi mjetin e përmbysur dhe njerëzit që mbaheshin pas tij, ndërsa të tjerë ndodheshin ende në ujë.
Të mbijetuarit dhe trupat e të vdekurve u transferuan më pas në një anije të rojës bregdetare dhe u dërguan në tokë. Në bord ndodheshin shtetas nga Pakistani, Bangladeshi dhe Egjipti.
