Një rast i pazakontë ka rikthyer në vëmendje debatet mbi ligjet e emigracionit në Mbretërinë e Bashkuar, pasi shqiptari Klevis Disha ka fituar të drejtën për të qëndruar në vend. 39-vjeçari kishte hyrë ilegalisht në Britani në vitin 2001 si i mitur dhe kishte përdorur një identitet të rremë për të kërkuar azil. Edhe pse kërkesa e tij fillestare u refuzua, ai arriti të përfitojë leje qëndrimi të përhershme në vitin 2005, duke ndërtuar më pas jetën e tij familjare me një partnere shqiptare dhe dy fëmijët e tyre.
Situata e tij ligjore u komplikua në vitin 2017, kur u dënua me dy vite burg pasi u kap me 250 mijë paund që konsideroheshin të ardhura nga aktivitet kriminal, çka sipas ligjit britanik e bënte automatikisht subjekt deportimi. Megjithatë, gjatë procesit të apelimit, avokati i tij argumentoi se largimi nga vendi do të kishte pasoja të rënda për djalin e tij 11-vjeçar, i cili vuan nga vështirësi të theksuara ushqimore dhe ndjeshmëri ndaj teksturave të ushqimit.
Pas një serie seancash që zgjatën mbi një vit, gjykata vendosi në favor të Dishës, duke u mbështetur në nenin 8 të Aktit për të Drejtat e Njeriut, që garanton të drejtën për jetën familjare. Gjykatësi vlerësoi se zhvendosja e fëmijës në Shqipëri do të përbënte një sfidë serioze për mirëqenien e tij, duke marrë parasysh regjimin e kufizuar ushqimor dhe vështirësitë që ai has jashtë ambientit ku është rritur. Vendimi ka ngjallur diskutime të forta mbi balancën mes zbatimit të ligjit dhe mbrojtjes së të drejtave familjare.
