Marrëdhëniet diplomatike mes Tiranës dhe Berlinit kanë hyrë në një fazë të ftohtë, duke prodhuar një bllokadë të papritur në rrugëtimin integrues të Shqipërisë. Edhe pse Komisioni Europian ka dhënë dritën jeshile, raporti kritik IBAR, i cili shërben si viza e domosdoshme për mbylljen e kapitujve të negociatave, ka ngecur në zyrat e Këshillit të BE-së.
Burimet diplomatike dhe mediat ndërkombëtare konfirmojnë se Gjermania është shteti që ka vendosur "veton" e përkohshme, e irrituar nga ajo që shihet si një luftë e hapur e kryeministrit Edi Rama kundër institucioneve të reja të drejtësisë dhe mbrojtje politike për zyrtarët e lartë të korruptuar.
Shkaku kryesor i këtij tensioni lidhet me qëndrimet e fundit të mazhorancës ndaj SPAK-ut dhe refuzimin për t'i hequr imunitetin zëvendëskryeministres Belinda Balluku, një lëvizje që Berlini e konsideron si pengim të drejtësisë.
Media prestigjioze gjermane “Internationale Politik Quarterly” bën të ditur se qeveria gjermane po i trajton rastet e korrupsionit të profilit të lartë në Tiranë me një rreptësi të pazakontë, duke kërkuar që ministrat e dyshuar jo vetëm të largohen nga kabineti, por të përballen me hetime të plota dhe të papenguara. Për Berlinin, suksesi i reformës në drejtësi është vija e kuqe që nuk mund të shkelet, ndërsa manovrat e fundit ligjore për të ndryshuar kompetencat e prokurorisë speciale shihen si hapa pas në sundimin e ligjit.
Në prapaskenë, kjo përplasje ka marrë përmasat e një kursi përplasjeje totale. Ndërsa Gjermania ka investuar miliona euro dhe burime njerëzore në trajnimin dhe mbështetjen e SPAK-ut, lëvizjet e Tiranës për të anashkaluar rekomandimet e tyre kanë sjellë një krizë besimi.
Situata është rënduar edhe nga skandale të tjera diplomatike, si incidenti me ambasadën shqiptare në Berlin dhe përplasjet për projektin e Portit të Durrësit. Në përgjigje të këtij izolimi nga qendra e Europës, kryeministri Rama duket se ka nisur një strategji mënjanimi, duke u përpjekur të gjejë strehë te mbështetja amerikane përmes lëvizjeve simbolike, si shpallja e Iranit shtet terrorist, një hap që e rreshton Shqipërinë krah SHBA-së por e ndan nga linja zyrtare e Bashkimit Europian.
Pa marrjen e raportit IBAR, Shqipëria mbetet "në vendnumëro", pasi metodologjia e re e anëtarësimit ndalon mbylljen e çdo kapitulli tjetër pa vërtetuar progresin në kapitujt 23 dhe 24 që lidhen me drejtësinë.
Ndërkohë që vende si Mali i Zi po avancojnë me shpejtësi drejt anëtarësimit, Shqipëria rrezikon të mbetet jashtë paketës së zgjerimit për shkak të asaj që në Berlin etiketohet si "mungesë e vullnetit politik për të lënë drejtësinë të bëjë punën e saj". Kjo bllokadë nuk është thjesht teknike, por një mesazh i qartë politik se rruga drejt Brukselit kalon pashmangshmërisht nga zyrat e SPAK-ut, pa asnjë kompromis me imunitetet politike.
