Një situatë e papritur ka ndodhur në burgun e Malandrinos gjatë një kontrolli të qelisë së të dënuarit me burgim të përjetshëm, Klodian Lekocaj.
Sipas mediave greke, efektivët e Njësisë për Luftimin e Krimit të Organizuar u habitën kur gjetën derën e qelisë të bllokuar nga brenda me një dry të madh dhe një pengesë shtesë, duke penguar hyrjen e tyre. Ky veprim shkel rregulloren e burgjeve, e cila parashikon që qelitë të mbyllen vetëm nga jashtë, për të garantuar kontrollin e personelit.
Për të hyrë në qeli, policia u detyrua të thyejë derën. Brenda saj, ata konstatuan se Lekocaj kishte shkatërruar një telefon celular dhe i kishte vënë zjarrin, në përpjekje për të fshehur të dhënat. Pajisja është sekuestruar dhe do të analizohet nga laboratorët kriminalistikë, me shpresën që informacioni i ruajtur të mos jetë dëmtuar. Hetuesit synojnë të zbulojnë kontaktet dhe komunikimet e të dënuarit.
Klodian Lekocaj është dënuar si porositës i vrasjes së avokatit Mihalis Zafirópulos dhe dyshohet se ka qenë i përfshirë edhe në të paktën tre vrasje të tjera.
