Një video e mbërritur në redaksinë tonë nga një qytetar i Lushnjës na sjell në vëmendje një mesazh të bukur për traditën dhe kulturën shqiptare.
Pamjet janë filmuar mbrëmjen e djeshme në fshatin Halilaj, ku një i ri shfaqet duke i rënë me pasion klarinetës, ndërsa rreth tij dëgjohet muzika me motive të jugut, një nga pasuritë më të çmuara të folklorit shqiptar.
Atmosfera në video është e thjeshtë dhe autentike, një moment spontan mes të rinjve, që tregon se muzika popullore vazhdon të jetojë edhe tek brezi i ri.
Qytetari që na dërgoi videon thotë se qëllimi i tij ishte të tregojë se gjithnjë e më shumë të rinj po rikthehen te traditat dhe muzika që kanë shoqëruar shqiptarët ndër breza.
Sipas tij, kjo është një shenjë ndërgjegjësimi për ruajtjen e identitetit kulturor në një kohë kur shumë rryma moderne rrezikojnë të zbehin trashëgiminë tonë.
Muzika popullore shqiptare, sidomos ajo e jugut me klarinetë, ka qenë për dekada një simbol i gëzimeve, dasmave dhe jetës së përditshme në shumë zona të vendit.
Rasti i të rinjve nga Halilaj shihet si një shembull pozitiv që tregon se tradita nuk është harruar dhe se ka ende një brez që dëshiron ta mbajë gjallë atë.
“Është një rast për t’u marrë shembull nga gjithë Shqipëria”, shkruan qytetari që na dërgoi videon.
