Gjykata Kushtetuese e Kosovës ka ndërhyrë vrullshëm në zhvillimet e fundit politike, duke vendosur një masë të përkohshme që pezullon efektet e dekretit të Presidentes Vjosa Osmani për shpërndarjen e Kuvendit. Ky vendim, i marrë mbrëmjen e së hënës, dikton një armëpushim të detyruar institucional deri më 31 mars, duke bllokuar çdo hap drejt zgjedhjeve të parakohshme.
Vendimi i Gjykatës vjen si përgjigje ndaj ankimimit të dorëzuar nga Lëvizja Vetëvendosje (LVV), partia në pushtet e kryeministrit Albin Kurti. LVV i kërkoi interpretim Kushtetueses lidhur me lëvizjen e Presidentes, duke argumentuar se shpërndarja e legjislativit ishte e parakohshme.
Me këtë masë të re, Presidentes Osmani i ndalohet rreptësisht shpallja e datës së zgjedhjeve, ndërsa Kuvendi mbetet në një gjendje "pezull", pa mundësi për të ushtruar funksionet e tij deri në fund të muajit. Sipas Gjykatës, ky hap është i domosdoshëm për të parandaluar një "dëm të pariparueshëm për rendin kushtetues" dhe për të garantuar funksionimin demokratik të institucioneve kyçe.
Prapaskena e kësaj përplasjeje lidhet me seancën e dështuar të 5 marsit. Opozita refuzoi kategorikisht dy emrat e propozuar nga Lëvizja Vetëvendosje për postin e Presidentit: Glauk Konjufca dhe Fatmire Kollçaku-Mullhaxha.
Mungesa e kuorumit prej 80 deputetësh në sallë e bëri të pamundur votimin, duke e çuar procesin drejt dështimit. Megjithëse rregullat përcaktojnë se Presidenti mund të zgjidhet edhe me 61 vota në raundin e tretë, pa praninë e 80 deputetëve në sallë, asnjë raund nuk mund të fillojë.
Kjo masë e përkohshme i jep kohë Gjykatës Kushtetuese për të shqyrtuar me themel ligjshmërinë e dekretit të Presidentes. Deri atëherë, Kosova mbetet në një pritje të tensionuar. Nëse Gjykata i jep të drejtë Presidentes pas 31 marsit, vendi do të shkojë zyrtarisht në zgjedhje të parakohshme. Në të kundërt, palët do të detyrohen të kthehen në sallën e Kuvendit për të gjetur një konsensus që deri më sot duket i pamundur.
