Shtetet e Bashkuara kanë nisur një fushatë të re ushtarake në Ekuador, duke bashkëpunuar me ushtrinë vendase në një operacion të përbashkët kundër rrjeteve të trafikimit të drogës.
Nisma u shpall më 3 mars nga United States Southern Command (Komanda Jugore e SHBA-së), e cila bëri të ditur se qëllimi është goditja e asaj që Uashingtoni e cilëson si “narko-terrorizëm”, organizata kriminale që përdorin dhunë dhe korrupsion për të kontrolluar territore dhe korridore trafiku.
Komandanti i kësaj strukture, gjenerali Francis L. Donovan, vlerësoi angazhimin e forcave të armatosura ekuadoriane, duke theksuar se objektivi është çmontimi i strukturave kriminale që kanë destabilizuar komunitete të tëra në rajon.
Për qeverinë e presidentit Daniel Noboa, ky bashkëpunim përfaqëson një fazë të re në përpjekjet për rikthimin e rendit dhe sigurisë në vend, i cili muajt e fundit është përballur me rritje të ndjeshme të dhunës së lidhur me krimin e organizuar.
Detajet taktike të operacionit nuk janë bërë publike nga autoritetet në Quito, por zhvillimi konsiderohet si zgjerim i rolit amerikan në luftën kundër rrjeteve të drogës në Amerikën Latine.
