Largimi i Cristiano Ronaldo nga Arabia Saudite ka tërhequr vëmendjen e mediave ndërkombëtare, pas përshkallëzimit të tensioneve në Lindjen e Mesme.
Ylli portugez u nis mbrëmjen e së hënës drejt Madridit, pasi disa ndeshje në rajonin e Gjirit u shtynë për arsye sigurie. Sipas të dhënave nga Flightradar24, avioni i tij privat u ngrit nga Riyadhi rreth orës 21:00 (ora lokale) dhe mbërriti në Spanjë gjatë natës së të martës, duke kaluar mbi Egjipt dhe Mesdhe.
39-vjeçari, i cili aktivizohet me klubin saudit Al-Nassr, u largua pasi u shty ndeshja e çerekfinales së AFC Champions League kundër Al-Wasl. Takimi ishte planifikuar të zhvillohej në Dubai këtë të mërkurë.
Vendimi për shtyrjen e ndeshjeve erdhi nga Asian Football Confederation (AFC), e cila njoftoi se po riorganizon përballjet e raundit të parë të fazës së 1/16-ave në rajonin perëndimor, duke përmendur arsye sigurie. Ndeshjet në rajonin lindor do të zhvillohen sipas planit.
Situata e sigurisë në rajon është tensionuar ndjeshëm pas sulmeve me raketa dhe dronë nga Irani, që sipas raportimeve janë ndërmarrë si kundërpërgjigje ndaj sulmeve të përbashkëta amerikano-izraelite. Ndërkohë, Ministria e Mbrojtjes Saudite bëri të ditur se dy dronë goditën pranë Ambasadës Amerikane në Riyadh, duke shkaktuar një zjarr të vogël dhe dëme materiale, por pa persona të lënduar.
Ronaldo jeton në Riyadh së bashku me partneren e tij, Georgina Rodríguez, dhe pesë fëmijët e tyre.
Këtë sezon, sulmuesi portugez ka realizuar 22 gola në 26 ndeshje me Al-Nassr, ndërsa kontrata e tij me klubin saudit është e vlefshme deri në vitin 2027.
