Një sherr i nisur për një parkim të gabuar ka përfunduar me arrestimin e një 40-vjeçari në qytetin e Kukësit. Ngjarja ka ndodhur gjatë ditës së martë në rrugën "1 Qershori", ku një konflikt banal ka agravuar në dhunë fizike ndaj forcave të rendit.
Sipas njoftimit zyrtar nga Drejtoria Vendore e Policisë Kukës, shtetasi me iniciale G. Sh., banues në këtë qytet, ka kundërshtuar me dhunë efektivin e policisë, shtetasin G. S., i cili ishte në krye të detyrës. Polici i kishte kërkuar 40-vjeçarit dokumentacionin e automjetit, pasi kishte konstatuar se mjeti ishte parkuar në shkelje të rregullave të qarkullimit rrugor.
Në vend që të paraqiste dokumentet, 40-vjeçari ka reaguar agresivisht duke përdorur forcën ndaj punonjësit të policisë. Specialistët për Hetimin e Krimeve, në bashkëpunim me Oficerin e Policisë Gjyqësore, bënë arrestimin e tij të menjëhershëm në flagrancë.
Përveç prangosjes së autorit, policia bën me dije se automjeti është sekuestruar në cilësinë e provës materiale. Tashmë, 40-vjeçari do të përballet me drejtësinë për veprën penale të kundërshtimit me dhunë të punonjësit të policisë.
