Një përplasje fizike shpërtheu në Parlamentin e Turqisë, pasi deputetët e mazhorancës dhe opozitës u përplasën për emërimin e një figure kontroverse në postin e ministrit të Drejtësisë.
Incidenti ndodhi gjatë betimit të Akin Gurlek, i emëruar nga presidenti Recep Tayyip Erdogan në krye të Ministrisë së Drejtësisë pas një riformatimi të kabinetit. Deputetët e opozitës u përpoqën të bllokonin ceremoninë e betimit, duke kundërshtuar emërimin e tij.
Pamjet nga salla e Parlamentit tregojnë ligjvënës duke shtyrë njëri-tjetrin, ndërsa në disa momente situata degradoi në përplasje me grushte.
Gurlek, si ish-prokuror i përgjithshëm i Stambollit, ka drejtuar procese gjyqësore ndaj disa figurave të Partisë Popullore Republikane (CHP), forca kryesore opozitare. Opozita i ka cilësuar prej kohësh këto procese si të motivuara politikisht, ndërsa qeveria këmbëngul se drejtësia vepron në mënyrë të pavarur.
Pas tensioneve, Gurlek u pa duke bërë betimin i rrethuar nga deputetë të partisë në pushtet.
Në të njëjtën kohë, Erdogan emëroi Mustafa Ciftci, guvernator i provincës Erzurum, në postin e ministrit të Brendshëm.
Ndryshimet në kabinet vijnë në një moment delikat për Turqinë, teksa vendi po diskuton reforma të mundshme kushtetuese dhe një iniciativë paqeje me Partinë e Punëtorëve të Kurdistanit (PKK), me synimin për t’i dhënë fund një konflikti shumëvjeçar.
Deri tani, nuk është dhënë një arsye zyrtare për riformatimin e qeverisë, ndërsa në njoftimin zyrtar thuhet se ministrat e mëparshëm “kanë kërkuar të lirohen nga detyra”.
