Presidenti i Kolumbisë, Gustavo Petro, deklaroi se i ka shpëtuar një tentative për atentat gjatë një udhëtimi me helikopter në bregdetin e Karaibeve.
Sipas tij, ngjarja ndodhi të hënën në mbrëmje, kur helikopteri me të cilin po udhëtonte nuk arriti të ulej në destinacion për shkak të informacioneve se persona të paidentifikuar mund të hapnin zjarr ndaj mjetit ajror.
Duke folur gjatë një mbledhjeje të kabinetit, e transmetuar drejtpërdrejt, Petro tha se për shkak të rrezikut, helikopteri u drejtua mbi det të hapur për rreth katër orë.
“U nisëm drejt detit të hapur për katër orë dhe mbërrita diku ku nuk ishte planifikuar, duke i shpëtuar vrasjes,” u shpreh ai.
Petro ka paralajmëruar prej muajsh për ekzistencën e një komploti të dyshuar nga trafikantë droge kundër tij, megjithatë autoritetet nuk kanë dhënë ende detaje zyrtare mbi incidentin e fundit.
Ngjarja vjen në një kohë tensionesh të vazhdueshme në Kolumbi, ku çështjet e sigurisë dhe lufta kundër krimit të organizuar mbeten sfida të mëdha për qeverinë.
