Një lajm i mrekullueshëm është ndarë sot nga imami Elvis Naçi, duke sjellë gëzim dhe shpresë për vogëlushin Kostantin dhe familjen e tij. Në një postim të shoqëruar një foto që tregon se si vogëlushi ishte dhe është sot, shihet qartë ndryshimi i jashtëzakonshëm i foshnjës, i cili tashmë ka ngrohur sërish zemrat e prindërve të tij.
Elvis Naçi shkruan se sot jemi dëshmitarë të një beteje të madhe të fituar për jetën. Kostantini duket më i fortë, më i qetë dhe më i bukur, ndërsa prindërit e tij më në fund mund ta përqafojnë. Ai u bën thirrje të gjithëve të mos i ndalin lutjet, që vogëlushi të shërohet plotësisht dhe të kthehet sa më shpejt në atdhe.
Kujtojmë se vetëm pak ditë më parë, Kostantini, atëherë vetëm 5-javësh, ndodhej në gjendje kritike shëndetësore, i shtruar në inkubator dhe i lidhur me aparatura që e mbanin gjallë. Ai vuante nga një problem serioz në ezofag, i cili rrezikonte jetën e tij, ndërsa shpresa e vetme ishte trajtimi i specializuar jashtë vendit, i papërballueshëm financiarisht për familjen.
Falë apelit të bërë nga ‘Shqiptarët për Shqiptarët’, Fondacioni Firdeus dhe JOQ Albania, brenda dy ditësh u mblodh në kohë rekord shuma e nevojshme dhe vogëlushi u nis drejt Italisë për trajtim. Sot, rezultatet e para janë më se inkurajuese.
Ky rast është një tjetër dëshmi e fortë se solidariteti i shqiptarëve shpëton jetë. Një komb i tërë u bashkua për një foshnjë dhe sot, falë këtij bashkimi, kemi arsye të buzëqeshim dhe të shpresojmë.
