Raporti i fundit i Fondit Monetar Ndërkombëtar (FMN) ka publikuar shifra shqetësuese për ekonominë shqiptare, duke e renditur vendin tonë ndër të fundit në Europë për të ardhurat për frymë. Ndonëse qeveria shpesh krenohet me rritjen ekonomike, të dhënat e vitit 2025 tregojnë se paraja e shqiptarëve vlen më pak se ajo e fqinjëve për shkak të kostos së lartë të jetesës.
Sipas FMN-së, të ardhurat për frymë në Shqipëri kanë arritur në 11 mijë dollarë, duke lënë pas vetëm Maqedoninë e Veriut, Bosnjën dhe Kosovën. Megjithatë, ky "parakalim" është kryesisht artificial, i ndikuar nga nënçmimi i euros dhe dollarit, dhe jo nga një rritje reale e mirëqenies.
Në rajon, Serbia ka marrë lidershipin e padiskutueshëm me 15.3 mijë dollarë për frymë, duke lënë pas edhe Malin e Zi (14.9 mijë), i cili kryesonte listën prej vitesh.
Aty ku Shqipëria goditet më fort është treguesi i Fuqisë Blerëse (PPP), i cili mat sa mallra dhe shërbime mund të blesh realisht me paratë që fiton.
Paradoksi: Edhe pse kemi të ardhura më të larta se Maqedonia e Veriut në letër, paraja jonë blen më pak. Maqedonia e Veriut renditet në vendin e 77-të në botë, ndërsa Shqipëria zbret në vendin e 85-të.
Kostoja e jetesës: Shqiptarët përballen me çmime më të larta, gjë që e bën jetën në vend më të shtrenjtë se te fqinjët, pavarësisht shifrave të PBB-së.
Distanca me vendet e zhvilluara mbetet humnerë. Të ardhurat për frymë të shqiptarëve janë sa:
28% e mesatares së Europës.
23.7% e mesatares së Bashkimit Europian (ku mesatarja është 46,804 USD).
Shqipëria nuk ka arritur të prekë as mesataren globale prej 14.6 mijë dollarësh, duke mbetur në nivelin e 76% të saj. Ky raport tregon se ndonëse statistikat në letër mund të përmirësohen nga kursi i këmbimit, standardi real i jetesës për qytetarin e thjeshtë mbetet në nivele kritike krahasuar me pjesën tjetër të kontinentit.
