Një udhëtim pushimesh në Spanjë u shndërrua në një përvojë të dhimbshme për çiftin francez Patrick dhe Evelyne Sire, pasi macja e tyre, Filou, u zhduk pa lënë asnjë gjurmë gjatë një ndalese për karburant në rajonin e Katalonjës.
Ngjarja ndodhi në gusht të vitit 2025, kur macja përfitoi nga dritarja e hapur e kamperit dhe u largua. Për disa javë me radhë, pronarët e saj kërkuan pa pushim në zonat përreth, kontaktuan shoqata për mbrojtjen e kafshëve dhe njoftuan policinë spanjolle, por pa asnjë rezultat.
Me kalimin e kohës, shpresa për ta gjetur u shua. Filou, një mace bardh e zi, u konsiderua e humbur përgjithmonë në një vend të huaj.
Por ajo që ndodhi më pas sfidoi çdo logjikë njerëzore.
Më 9 janar 2026, plot pesë muaj pas zhdukjes, një grua në Homps të Francës, vetëm 500 metra larg shtëpisë së çiftit Sire, gjeti një mace të dobët dhe të rraskapitur. Vizita te veterineri zbuloi përmes mikroçipit se bëhej fjalë për Filou.
Sipas vlerësimeve, macja kishte përshkuar rreth 250 kilometra në këmbë, duke kaluar terrene të vështira, male, lumenj dhe madje edhe kufirin shtetëror midis Spanjës dhe Francës, vetëm për t’u kthyer në shtëpi.
Edhe pse kishte humbur shumë peshë dhe ishte e ftohur, Filou ishte gjallë dhe në gjendje të stabilizuar.
Sipas shkencës, ky fenomen shpjegohet me kujtesën hapësinore shumë të zhvilluar të maceve, si dhe aftësinë e tyre për t’u orientuar përmes fushës magnetike të Tokës dhe aromave të njohura.
Për Patrick dhe Evelyne, megjithatë, kjo nuk është thjesht një shpjegim biologjik, por një dëshmi e jashtëzakonshme besnikërie. Një histori që tregon se instinkti për t’u kthyer në shtëpi është më i fortë se çdo distancë apo vështirësi.
