Dënohet grupi shqiptar në Itali, mes tyre edhe Elvis Demçe

Gjykata italiane ka dhënë vendime dënimi ndaj një grupi prej 14 personash të akuzuar për trafik droge, armëmbajtje dhe zhvatje. Mes tyre është edhe Elvis Demçe, i cili pas shqyrtimit me procedurë të shkurtuar është dënuar me 11 vjet e 4 muaj burg.

Ky vendim i shtohet një dënimi të mëparshëm prej 15 vjet e 4 muajsh, tashmë i formës së prerë për trafik droge. Autoritetet italiane kanë regjistruar gjithashtu dy marrëveshje për pranimin e fajësisë, ndërsa 12 të pandehur të tjerë do të përballen me gjykimin e rregullt.

Sipas mediave italiane, Demçe ndodhet aktualisht në burgun e Sassar-it nën regjimin e posaçëm 41-bis, duke u cilësuar si i pari shqiptar dhe italo-shqiptar i vendosur nën këtë regjim të ashpër. Ndaj tij vijojnë edhe procedura të tjera penale, përfshirë një dënim jo përfundimtar prej 18 vjetësh e gjysmë për tentativë vrasjeje në vitin 2020 në zonën e Acilias në Romë.