Muzeu francez i Luvrit ka vendosur bara hekuri mbi ballkonin nga i cili grabitësit hynë në muze më 19 tetor, në një vjedhje spektakolare të bizhuterive të kurorës.
Katër persona depërtuan në galerinë Apollo, thyen një dritare dhe hapën kutitë e ekspozitës me prerëse këndi, duke ikur më pas me skuterë të drejtuar nga bashkëpunëtorët e tyre. Vlera e bizhuterive të vjedhura është rreth 102 milionë dollarë, ndërsa grabitja zgjati më pak se 7 minuta, duke zbuluar dobësi të rëndësishme në sigurinë e muzeut.
Në një deklaratë për mediat, muzeu njoftoi se po merr masat e nevojshme për të përmirësuar sigurinë: një njësi policore mobile është vendosur pranë piramidës ikonike të xhamit, dhe vitin e ardhshëm do të instalohen 100 kamera shtesë rreth muzeut.
Policia ka identifikuar tetë të dyshuar lidhur me grabitjen, por bizhuteritë ende nuk janë gjetur.
Hyrja e dhunshme ka ngritur pyetje serioze për sigurinë në Luvër, i cili ruan disa nga veprat më të çmuara të artit botëror, përfshirë Mona Lizën. Punonjësit e muzeut pranuan se ekzistonte një mungesë mbulimi me kamera sigurie mbi muret e jashtme dhe mbi ballkonin e përdorur nga grabitësit.
Kjo grabitje është vetëm një nga problemet e shumta që kanë prekur muzeun kohët e fundit një galeri pranë Apollo u mbyll për shkak të dobësisë strukturore, një rrjedhje uji dëmtosi libra në departamentin e antikiteteve egjiptiane, dhe muzeu u mbyll pjesërisht për disa ditë pas grevës së stafit.
