Presidenti amerikan Donald Trump ka njoftuar se ka firmosur një urdhër ekzekutiv që e klasifikon fentanilin e paligjshëm si “armë të shkatërrimit në masë”, një hap që synon forcimin maksimal të luftës kundër trafikut të kësaj substance vdekjeprurëse.
Gjatë një deklarate në Zyrën Ovale, Trump tha se trafikimi i fentanilit drejt SHBA-së nuk është thjesht krim i zakonshëm, por një kërcënim serioz kombëtar. Sipas tij, kundërshtarët e Amerikës e përdorin këtë drogë me qëllim për të shkaktuar humbje masive jete, duke e krahasuar situatën me një formë lufte të heshtur kundër qytetarëve amerikanë.
Presidenti e krahasoi përhapjen e fentanilit me importet e opiumit që shkatërruan Kinën në shekullin XIX, duke theksuar se drogat kanë qenë historikisht një mjet për të dobësuar shtetet dhe shoqëritë. Ai deklaroi se sot po tentohet e njëjta gjë ndaj Shteteve të Bashkuara.
Trump theksoi se fentanili është jashtëzakonisht vdekjeprurës edhe në doza minimale, ndërsa shtoi se kjo substancë hyn në SHBA kryesisht përmes kufirit me Meksikën, por edhe përmes sistemeve ndërkombëtare të postës dhe transportit. Megjithatë, ai pranoi se fentanili ka përdorime të ligjshme mjekësore, kur administrohet në mënyrë të kontrolluar.
Sipas të dhënave të përmendura nga presidenti, përdorimi i paligjshëm i fentanilit ka shkaktuar afro 330 mijë vdekje në SHBA vetëm gjatë pesë viteve të fundit, duke u kthyer në një nga shkaqet kryesore të vdekjeve për moshat 18–45 vjeç.
Në dokumentin zyrtar të publikuar nga Shtëpia e Bardhë thuhet se urdhri ekzekutiv i ri i jep kompetenca shtesë autoriteteve federale, duke përfshirë ndjekje penale më të ashpra, rritje dënimesh për trafikantët, masa financiare ndaj rrjeteve kriminale dhe institucioneve që i mbështesin, si dhe përfshirje të strukturave të sigurisë kombëtare në rastet emergjente që lidhen me fentanilin.
Administrata Trump argumenton se fentanili i paligjshëm i afrohet më shumë një arme kimike sesa një narkotiku, pasi vetëm dy miligramë mund të jenë fatalë. Gjithashtu, sipas Shtëpisë së Bardhë, fitimet nga kjo drogë përdoren nga kartelë dhe organizata kriminale për të financuar terrorizmin, dhunën dhe aktivitete destabilizuese.
Presidenti Trump deklaroi se kjo masë synon të mobilizojë të gjithë mekanizmin federal për ta trajtuar fentanilin si kërcënim të drejtpërdrejtë ndaj sigurisë kombëtare, duke premtuar se lufta kundër kartelëve dhe rrjeteve ndërkombëtare të drogës do të vazhdojë pa kompromis.
