Dy ushtarë të Ushtrisë së Shteteve të Bashkuara dhe një përkthyes civil u vranë të shtunën gjatë një sulmi të armatosur në Siri, bëri të ditur Departamenti Amerikan i Mbrojtjes. Sipas Pentagonit, tre persona të tjerë mbetën të plagosur.
Zëdhënësi kryesor i Pentagonit, Sean Parnell, deklaroi se sulmi ndodhi teksa ushtarët amerikanë po zhvillonin një angazhim të rëndësishëm me udhëheqës lokalë, në kuadër të misioneve të vazhdueshme kundër ISIS-it dhe terrorizmit në rajon. Ai shtoi se identiteti i viktimave nuk do të bëhet publik deri në njoftimin zyrtar të familjarëve.
Sekretari Amerikan i Mbrojtjes, Pete Hegseth, reagoi ashpër pas ngjarjes, duke theksuar se sulmuesi u vra nga forcat partnere në terren. “Nëse shënjestroni amerikanët, kudo në botë, do ta kaloni pjesën tjetër të jetës suaj duke e ditur se Shtetet e Bashkuara do t’ju ndjekin, do t’ju gjejnë dhe do t’ju eliminojnë pa mëshirë,” u shpreh ai.
Sipas agjencisë zyrtare siriane të lajmeve SANA, ushtarët amerikanë u qëlluan gjatë një patrullimi të përbashkët me forcat siriane në Sirinë qendrore. Pas incidentit, trafiku në autostradën që lidh Deir Ezzor me Damaskun u ndalua përkohësisht.
SANA raportoi gjithashtu se helikopterë amerikanë ndërhynë për të evakuuar të plagosurit drejt bazës ushtarake al-Tanf. Kjo bazë amerikane ndodhet në Sirinë lindore, pranë kufirit me Irakun, dhe shërben si një pikë strategjike për operacionet kundër terrorizmit në rajon.
